An-nuur Na. 161

AN-NUUR Na.161 Rabiul Thani 1419, Agosti 7-13, 1998

Wanawake Arusha watakiwa kutafuta elimu

Na Habiba Swedi, Arusha

MWALIMU wa akina mama katika Madrasatul-Hidaya ya mjini hapa (Arusha), Ustadha Maryam Salim Ally, amewashauri Wanawake wa Kiislamu nchini kutafuta elimu ili kupata radhi ya Mwenyezi Mungu

Aliyasema haya alipokuwa katika mahojiano ya ana kwa ana na mwandishi wa habari hizi alipomtembelea katika madrasatul-Hidaya, iliyopo kijijini Ererai kata ya Sombetini, Wilaya ya Arusha mjini.

Aliendelea kusema kuwa, akinamama wa Kiislamu, wanayasahau majukumu yao kutokana na ukosefu wa elimu ya dini yao.

Katika kutoa ushauri huo, Ustadha Maryamu amesema kwamba ni kwa njia ya elimu tu, ndipo akina mama wataweza kujenga mioyo ya dini na hivyo kulea familia katika maadili mazuri ya dini ya Kiislamu.

Amefafanua kwamba, hata kama mama anahangaika na utafutaji riziki kwa familia yake, na kwamba utafutaji huo ni mgumu, bado mama huyo anashauriwa kutenga japo saa moja ya kujielimisha.Ustadha Maryamu aliongeza kuwa, hata Mtume Muhammad (s.a.w.) zama zake, alitoa da’awa huku akihangaika kutafuta riziki.

Aliasa kuwa; riziki ya mja inatolewa na Mwenyezi Mungu, na lau kama inapatikana kwa taabu tena kidogo kidogo, mama asikate tamaa.

"Ajibidiishe kuitafuta riziki hiyo huku akimwamini mola wake kuwa atamfungulia, na imani hii itamjia mama huyu, endapo tu ana elimu ya dini", alisema Ustadha Maryam.

Alimalizia kwa kuzidi kutoa ushauri kuwa; elimu ya dini yake, itamfanya mama wa Kiislamu, kukabiliana na madhila yote yaliyopo katika jamii, na hatoyumbishwa juu ya jambo lolote; kwani ndani ya Qur’ani kunapatikana kila kitu, akiwa na maana kuwa, Qur’ani ni mwongozo na akaongeza kuwa ufafanuzi unapatikana pia katika hadithi za Mtume (s.a.w.).

Tamsa Tanga yapata viongozi wapya

Na Masoud Mohamed

JUMUIYA ya wanafunzi wa Kiislamu Tanzanhia (TAMSA) mkoa wa Tanga imepata uongozi mpya baada ya ule wa zamani kumaliza muda wake mwezi uliopita.

Uongozi huo ulipatikana katika mkutano mkuu wa mwaka uliofanyika tarehe 28 Julai kwenye Shule ya Sekondari ya Jumuiya.

Miongoni mwa mambo yaliyojadiliwa kwa kina ni pamoja na uimarishaji wa somo la maarifa ya Kiislamu na mavazi ya heshima (hijaab) mashuleni. Kutokana na kukosekana kwa ushirikiano kutoka BAKWATA; TAMSA imeazimia kufikia malengo yake kwa kushirikiana na Jumuiya ya Waalimu wa Kiislamu Tanga (JUWAKITA) badala yake.

Akitoa nasaha zake amiri wa JUWAKITA; Ustadh Khamis Hussein Shemtoi, alipongeza taratibu za kudumisha vikao vya kikatiba vya TAMSA. Hili alisema linaendana na agizo la Qur’an (3:159) ambalo linahimiza "Shuura". Pia aliwataka viongozi wapya wa TAMSA kuwa wasimamizi wazuri wa wenzao kuhakikisha wanasoma na kufaulu vizuri.

Waliochaguliwa ni:

(1) Ustadh Sudi Ahmed (Shule ya Popatlal) - Mwenyekiti

(2) Ustadh Chambuso R. Ramadhani (Jumuiya Sec.) M/kiti Msaidizi

(3) Ustadh Ali Abbasi (Popatlal) - Mweka Hazina

(4)Ustadh Athman Ibrahim (Usagara) - Katibu Mkuu

(5) Ustadh Ali Seif)

(6) Ustadh Kaimu Mwanjia) (Si wanafunzi) - Makatibu watendaji.