An-nuur Na. 182

AN-NUUR Na.182 Ramadhan 1419, Januari 1 - 7, 1998

Matokeo ya Darasa la Saba yacheleweshwa kusherehekea sikukuu ya Krismasi

Wananchi wahoji je, nchi hii ina dini moja tu?

WANANCHI mbalimbali wamewasiliana na gazeti hili wakieleza kushangazwa na kauli ya Wizara ya Elimu na Utamaduni kwamba matokeo ya mitihani ya darasa la saba yamechelewa kutolewa ili kuwapa fursa watoto wa Kikristo kusherehekea vizuri sikukuu ya Krismasi.

Wamesema taarifa hiyo iliyotolewa na baadhi ya vyombo vya habari imewaacha wananchi hao wakijiuliza maswali mengi kuliko majibu.

Katikati ya wiki hii msemaji wa Wizara ya Elimu wakati akielezea

moja ya sababu za kuahirishwa kutolewa matokeo ya mitihani ya darasa la saba mwaka huu mbele ya waandishi wa habari, alisema kama matokeo hayo yangetolewa kabla ya Krismasi watoto wa Wakristo ambao hawakuchaguliwa wasingesherehekea sikukuu ya Krismasi kwa furaha.

Bw. Abeid Juma akiongea na gazeti hili alisema kwamba kauli hii inawakilisha dhana iliyojengeka miongoni mwa watendaji wa serikali kamba wanafunzi wote ni Wakristo tena basi wakusherehekea Krismasi.

Kufuatia mawasiliano na wananchi waliotaka ufafanuzi wa maelezo ya Wizara, AN-NUUR iliwasiliana na Wizara ya Elimu kutaka kujua ukweli wa madai haya. Baada ya kumkosa Mh. Waziri na Katibu wake Mkuu, Msemaji mmoja ambaye hakutaka kutaja jina lake alikiri kwamba Katibu Mkuu wa Wizara alitoa sababu hiyo lakini akadai kuwa hiyo haikuwa sababu pekee. Hata hivyo hakutoa ufafanuzi zaidi.

Kilichowafurahisha wananchi walioongea na gazeti hili ni kuona jinsi Wizara ilivyo makini na inavyojali na kuthamini hisia za kidini za wanafunzi katika utendaji wake.

Hata hivyo, wamehoji je, nchi hii ina dini moja tu.

Taarifa hizi za kucheleweshwa kutolewa matokeo ya darasa la saba ili kuwawezesha watoto Wakristo kusherehekea vizuri Krismasi zimekuja wiki moja tu baada ya gazeti hili kuripoti kuwa wanafunzi Waislamu watalazimika kufanya mitihani ya kidato cha nne ndani ya Ramadhani na pengine kuikosa Id el Fitr.