An-nuur Na. 179

AN-NUUR Na.179 Shaaban 1419, Desemba 11 - 17, 1998

Hakuna njama za kupindua Bakwata - Sheikh Yahya

Asema kuna kutokuelewana

MKUU wa Idara ya Habari na Mambo ya Nje wa Bakwata, Sheikh Yahya Hussein amekanusha kuwepo njama za kupinduliwa uongozi wa Baraza hilo.

Akizungumza na gazeti hili nyumbani kwake mtaa wa Kagera Mwembechai Jijini Dar es Salaam, kiongozi huyo wa Bakwata amesema kuwa tuhuma hizo si za kweli na kwamba zimelenga kujenga hofu isiyo na msingi.

Sheikh Yahya amezihusha tuhuma hizo na mtafaruku uliomo Bakwata hivi sasa baina ya viongozi wake na kusema kwamba huenda ni baadhi ya viongozi wa baraza hilo walioneza uzushi huo.

"Hizi ni njama zimefanywa na baadhi ya uongozi wa Bakwata ili kuleta hofu kwa Mufti na akubaliane na uongozi huo juu ya ubaya wa wale wasiotakiwa", amesema Sheikh huyo.

Aliongeza kusema kuwa hakuna njama hizo na kama zingalikuwepo yeye angelifahamu mapema.

Hata hivyo, alikiri kupigiwa simu na mtu ambaye hakumfahamu kutoka mahali alipokuita "nyeti" akieleza kuhusu njama hizo.

Aidha alisema, Waislamu wanaelewa wazi njia ya kuichukua Bakwata si kuivamia bali kuitikia wito wa Mufti Hemed bin Juma wa kujiunga na Bakwata na kushiriki uchaguzi.

Alituhumu kuwepo kwa njama zinazopangwa na baadhi ya viongozi wakuu wa baraza kwa kushirikiana na baadhi ya viongozi wakubwa serikalini dhidi yake na Mufti.

Wiki iliyopita gazeti hili liliripoti kuhojiwa kwa baadhi ya Masheikh jijini kuhusiana na tuhuma zilizodaiwa kuwepo polisi juu ya mpango wa kupindua uongozi wa Bakwata makao makuu.

Hata hivyo, haikuweza kufahamika tuhuma hizi zilifikaje polisi na kwa vipi Masheikh waliotajwa walihusika na mpango huo. ndani ya Bakwata