An-nuur Na. 173

AN-NUUR Na.173 Rajab 1419, Oktoba 30 - Novemba 6, 1998

Akina mama watakiwa kushikamana na dini yao

AKINA mama Waislamu wametakiwa kushikamana na dini yao kama njia pekee ya kujikomboa. Hayo yamesemwa na wahadhiri mbalimbali kwenye kongamano la siku moja lililofanyika Oktoba 24, katika Msikiti wa Ijumaa Kigogo CCM Jijini Dar es Salaam.

Kongamano hilo lililohudhuriwa na akina mama wa Kiislamu wapatao 1500 lilianza saa mbili asubuhi kwa Qur’an tukufu, na kufuatiwa na mada ya elimu iliyotolewa na Amirah wa akinamama - Wilaya ya Kinondoni, Bi. Zaituni Ahmad ambaye alisisitiza kuwa elimu haina faida kama haitekelezwi. La muhimu ni kufanyia kazi yale yote tulioyasoma, alisema na akawataka akina mama wote ambao mpaka leo bado hawajajiunga na darsa za akina mama haraka sana wajiunge. Alisema Uislamu hautaki watu wajinga, na huwezi kuwa na uchungu na Uislamu ikiwa huufahamu.

Mada ya pili ilikuwa ni harakati za Kiislamu iliyotolewa na Ummu Hamza kubwa zaidi aliloliongelea ni kuusimamisha Uislamu katika maisha ya kila siku na kwamba Uislamu ndio mkombozi pekee wa kweli wa matatizo ya akina mama.

Aidha, alisema kwamba Qur’an ndio dira na mwongozo wa Waislamu na wala haitakiwi kutekeleza baadhi ya Aya bali Aya zote.

Bi Fatuma Lazaro, Katibu wa Kamati ya Kutetea Haki za Akinamama (T), alielezea kuwa tatizo kubwa kwa Waislamu ni kutokuishi Kiislamu katika maisha yao ya kila siku, na dawa pekee ya huku kunyanyaswa na kudhalilishwa ni kuuteleza Uislamu vilivyo, kwani nusra haiji kwa kutamani tu basi, bali huja baada ya kuchukua sababu za nusra na Allah habadilishi hali za watu mpaka wajibadilishie wao wenyewe kwanza.