An-nuur Na. 165

AN-NUUR Na.165 Jamadul Awwal 1419, Septembe 4 - 10, 1998

Dhana ya Udugu wa kiislamu

Mafungamano ya Imani katika Uislamu yana haki, thamani na uzito zaidi kuliko udugu wa damu, nasaba,ukoo, kabila, Taifa au udugu wa aina nyingine yoyote ile:

Hakika waumini wote ni ndugu" (49:10).

Uzito wa mafungamano hayo ya kiimani umezingatia udugu wa Wanaadamu wote kwamba wanatokana na baba na mama mmoja, yaani asili moja na wote wanaiwania hatima moja.

Umoja na udugu wa binaadamu unatokana na hao binadamu kuwa ni kizazi cha Adamu na Hawa. Kila binadamu ni memba wa familia hii, na hivyo kila memba anastahiki kupata haki zake katika familia hii kama alivyopia na dhima ya kutimiza wajibu wake.

Udugu wa kiimani haukomei katika kuwa na asili moja bali pia katika kuwa na lengo na nafasi moja hapa ulimwenguni, Mwenyezi Mungu anatufahamisha katika Qur’an: (7:172), (49:13).

Upeo huu mpana wa Qur’an kuhusu asili ya mwanaadamu, ndiyo kiini cha udugu mzito wa kiimani katika Uislamu.

Udugu huo unaimarika zaidi ndani ya makundi ya harakati za Kiislamu yenye madhumuni ya kufanya mageuzi ya Kiislamu katika jamii. Mageuzi ambayo si tu yatasimamisha haki bali pia yatajenga na kuboresha utu, mahusiano na maaingiliano ya wanajamii chini ya mfumo mpya wa sera na itikadi inayokwenda sambamba na maadili yake, yaliyofunzwa na kudhibitiwa na mjuzi, makamilifu na Muumba wa vyote. Kujenga udugu na mafungamano haya ya kiimani kwahitajia mazoezi ya muda mrefu yenye kuandamana na hatua mbali mbali za utekelezaji na ufuatiliaji.

Kuhusu msisitizo wa udugu wa kiimani katika kujizatiti kuondoa dhulma Qur’an yatueleza:

Enyi mlioamini shikeni hadhari zenu, tokeni(kwenda vitani) mmoja mmoja au kwa pamoja. (4:71)

Na mna nini hampigani katika njia ya Mwenyezi Mungu na (katika kuwaokoa) wale walio dhaifu katika wanaume na wanawake na watoto ambao husema Mola wetu! tutoe katika mji huu ambao watu wake ni madhalimu na utujaalie tuwe na ulinzi unaotoka kwako na tujaalie tuwe na kutunusuru anaetoka kwako" (4:7).