An-nuur Na. 183

AN-NUUR Na.183 Ramadhan 1419, Januari 8 - 14, 1998

Waislamu Moshi:

Wadai kulishwa nguruwe, vibudu

Sheikh azunguka mjini kuwaandaa Waislamu
Kauli ya Sarungi kuamua amani au mapambano

WAISLAMU Mjini Moshi wamedai kwamba wamekuwa wakilishwa nguruwe kwa makusudi kutokana na utaratibu wa Halmashauri ya Wilaya wa kusimamia machinjio ya nyama usiojali uwepo wa Waislamu.

Wamedai kwamba umekuwepo utaratibu wa mganga mmoja wa nyama kupima nyama ya ng’ombe, mbuzi na nguruwe kwa wakati mmoja na bila kubadili vifaa. Kwa utaratibu huo wamedai kwamba muhuri unaotumika kuwekea alama nyama ya nguruwe ndio huo huo hutumika kwa nyama ya ng’ombe na mbuzi.

Kutokana na madai hayo, Katibu wa Bakwata Wilaya ya Moshi Mjini Sheikh Mnyone amekuwa akizungukia Misikiti yote mjini Moshi kuwaeleza Waislamu juu ya hali hiyo na kutafakari pamoja nini cha kufanya.

ANNUUR ilipowasiliana na ofisi husika; madai hayo yalikanushwa na kutolewa maelezo kwamba kuna waganga wawili na mihuri tofauti kwa nyama ya nguruwe. Hata hivyo madai hayo yalipingwa na Bw. Mnyone akisisitiza kwamba muhuri ni mmoja labda wabadili sasa baada ya malalamiko haya.

Kwa mujibu wa maelezo ya Sheikh Mnyone, madai mengine ya Waislamu ni kuwa machinjio ya nguruwe yapo karibu na makaburi ya Waislamu ambapo uchafu wa wanyama hao hutupwa makaburini hapo.

Aidha, nguruwe hao wanapoletwa kuuliwa huachwa wavinjari katika makaburi ya Waislamu.

Jambo jingine lililotajwa kama kero ni uchomaji wa mishikaki ya nguruwe karibu na Msikiti wa Suni na hoteli nyingine za kawaida. Vile vile imeelezwa kwamba kufunguliwa kwa mabucha ya nyama ya nguruwe karibu kabisa na kituo cha mabasi cha Kiboriloni ni kero nyingine. Walalamikaji wanadai ama kituo cha basi kihame eneo hilo au mabucha.

Kufuatia kero hizo, Katibu wa Bakwata Wilaya amekuwa akiwasilana na Mkurugenzi wa Halmashauri ya Mkoa ili kutafuta ufumbuzi.

Uchunguzi wa gazeti hili umegundua kuwa Mkurugenzi huyo alishapelekewa barua tatu toka mwezi Agosti, 1998 kuhusu suala hili.

Kutokana na Ofisi ya Mkurugenzi kutokuchukua hatua yoyote; Katibu wa Bakwata Desemba 21, 1998 alimwandikia barua Mkuu wa Mkoa Mh. Philemon Sarungi akimwomba aingilie kati suala hili.

Katika ziara zake Misikitini, Katibu wa Bakwata Sheikh Mnyone amekuwa akikabiliwa na wakati mgumu ambapo Waislamu wamekuwa wakidai ni kwanini halijafanyika jambo la kutoa fundisho kwa Mkurugenzi na wenye machinjio ya nguruwe.

Hata hivyo, Sheikh Mnyone amekuwa akiwapoza Waislamu na kuwataka wasubiri majibu ya Mkuu wa Mkoa.

Katika maelezo mengine imedaiwa kwamba upo wasiwasi wa watu kulishwa vibudu kwani Halmashauri imekuwa ikiteua wachinjaji bila kuwashirikisha viongozi wa dini.

Wasiwasi uliopo ni juu ya umakini na uadilifu wa watu wanaoteuliwa na Halmashauri kuchinja kama hawawezi kutumika "kuhalalisha" kilichokufa bila kuchinjwa. Ombi la Bakwata ni kwamba ishirikishwe kuwateua wachinjaji ili kuondoa wasiwasi wa kulishwa vibudu.