An-nuur Na. 170

AN-NUUR Na.170 Jamadul Akhir 1419, Oktoba 9 - 15, 1998

Waislamu wasisitiza: Nyumba ya Waziri Mkuu ni ya Waislamu

Wasema ilitaifishwa kimakosa
Wadai serikali iirejeshe na kulipa malimbikizo ya kodi ya nyumba

Na Mwandishi Wetu

WAISLAMU wamesisitiza kwamba nyumba iliyochukuliwa na Waziri Mkuu ni ya Waislamu na inapaswa kurejeshwa kwa wenyewe.

Pamoja na kuirejesha, Waislamu wamedai kwamba ni lazima serikali ilipe malimbikizo ya kodi toka ilipoipora nyumba hiyo mwaka 1971.

Waislamu mbalimbali walioongea na mwandishi wa habari hizi wamesema kwamba zipo nyumba zipatazo 11 za Waislamu katika maeneo ya Upanga n Oysterbay ambazo zimechukuliwa na serikali kinyume cha sheria.

Moja ya nyumba hizo ni ile iliyopo Oysterbay Plot No. 11 barabara ya Tumbawe ambayo imechukuliwa na Waziri Mkuu.

Awali, nyumba hiyo ilikuwa mali ya Ali Dewji Gangji wa Singida na baadaye kukabidhiwa East African Muslim Welfare Society (EAMWS) ambapo EAMWS ilipovunjwa Kabidhi Wasia Mkuu alikabidhi hati ya nyumba hiyo kwa Bakwata.

Hata hivyo, imeelezwa kwamba nyumba hiyo pamoja na nyingine zilitaifishwa na serikali mwaka 1971 kinyume cha sheria.

Mwenyekiti wa Kamati ya Nyumba za Bakwata Sheikh Yahya Hussein amesema kwamba katika nyumba 11 za Waislamu zilizopo eneo la Upanga ambazo zimeporwa na serikali ni nyumba mbili tu ambazo Bakwata imefanikiwa kuzipata kupitia msaada wa Mh. Mzee Rashid Kawawa.

Sheikh Yahya Hussein amesema kwamba zaidi ya nyumba hizo 9, kipo kiwanja cha Waislamu kilichopo kona ya Mitaa ya Mkunguni Bibi Titi na Morogoro Road ambacho kimeporwa na kupewa Benki ya Taifa ya Biashara (NBC).

Amesema kazi kubwa ya Kamati yake hivi sasa ni kuhakikisha kwamba serikali inazirejesha mali za Waislamu ili mali hizo ziweze kutumiwa katika namna ile ile iliyokusudiwa na wale waliotoa Waqf.

Zipo taarifa kutoka Wizara ya Sheria na Mambo ya Katiba kwamba serikali inataka kuilipa Bakwata fidia ili ichukue nyumba hiyo iwe ya Waziri Mkuu.

Hata hivyo, Waislamu hadhaa waliobahatika kuongea na mwandishi wa habari hizi, wamesisitiza kwamba jambo hilo haliwezi kukubalika.

Kiongozi mmoja ndani ya Bakwata ambaye hakutaka jina lake litajwe gazetini amesema kwamba nyumba hiyo haiwezi kuuzwa. Bali serikali kwanza ilipe malimbikizo ya kodi na kama Waziri Mkuu anaiependa basi aingie mkataba na Bakwata apangishwe.